金風衝出國際 伙拍Apple

【明報專訊】讀者可能未聽過金風科技（2208），小琴介紹番，佢係風力發電機製造商，點解要識佢？因為公司噚日宣布，會同Apple成立合資公司，就風電項目開展合作，日後唔知會唔會改名做「i風．電」？

名牌效應大 憧憬繼續合作

金風科技旗下全資附屬公司北京天潤，會將部分下屬項目公司嘅30%股權轉讓畀Apple，轉讓完成後，各項目公司就會變成中外合作經營企業，而且亦都唔會再納入集團合併報表範圍內，要衝出國際喇！公司話，仲會同Apple共同尋求其他合作機會，包括同Apple嘅生產合作伙伴，共同推動綠色電力嘅直供銷售。


今次係公司同Apple首次合作，合作得一次，梗係想有第二次啦，連公司都話，今次合作對集團作為風電解決方案提供商嘅品牌知名度同影響力有幫助。金風科技噚日收市跌緊0.33%，唔似有人偷步入貨喎，咁聽日又會升幾多呢？


[小琴密語]