葵青區「兩無」 只得鞦韆架 康文署遊樂場 4區冇滑梯

【明報專訊】盪鞦韆、瀡滑梯，係唔少人童年回憶嘅一部分，近年家長經常投訴公共遊樂場不足，而且小學雞，一啲都唔好玩；Emily就發現，原來康文署嘅遊樂場不止患寡而且患不均，觀塘、葵青、屯門同離島區嘅遊樂場，滑梯數目係「0」。


噚日民政事務局長劉江華書面回覆立法會會議員許智峯時提到，康文署轄下嘅兒童遊樂場，全港有634個（未計房署屋邨公園），北區有最多，成80個；黃大仙區就最少，只有15個。康文署又分別提供滑梯、鞦韆同攀爬架嘅全港分佈，全港共有57條滑梯，觀塘、葵青、屯門同離島區一條滑梯都無，中西區就有13條咁多，其他地區都只係得單位數字。


鞦韆架就唔同，全港有230個，其中深水埗佔最多，有29個，但南區同大埔都只係得兩個。


另外，全港有53個攀爬架，元朗區有9個，南區同葵青區就一個都無。換言之，葵青區嘅小朋友，又無滑梯亦無攀爬架玩。


康文署﹕考慮地形安全等因素分佈

睇番個地區分佈，Emily好奇康文署以咩準則決定起咩遊樂場設施，康文署就話，係考慮場地地形、面積、實際環境、相關國際安全標準、唔同人嘅需要同區議會意見等因素，制定公園整體設計概念同設計。康文署又話，同建築署有參考外國兒童遊樂設施嘅設計，遲啲會總結經驗提升設施。