去年跑步活動閃避跌倒 高永文重遇絆倒男童：多謝各方慰問

【明報專訊】食物及衛生局長高永文去年底參加2公里跑步活動時，為咗閃避仆倒男童而跌倒，額頭、口唇邊等多處縫針。事隔一年，局長再接再厲參加同一個活動，仲畀佢見番當日跌倒嗰個男童，活動最後順利舉行。


去年高局長跌倒後血流滿面，連顴骨都裂咗少少，當時復工見到佢額頭同鼻樑仍有紅腫及傷痕，局長噚日起跑前都話「有啲緊張」，因為要參加番同一個2公里賽事。佢一啲都唔計較舊事，仲主動多謝主辦單位、男童學校、家長同埋同學，喺佢受傷之後嘅關心同慰問，仲笑笑口話自己基本上康復，所以想支持呢個有益嘅體育活動。


逾千人拍打操創世界紀錄

高永文周日不時都會獲邀出席唔同活動，噚日就同副局長陳肇始參加銀綫灣獅子會舉辦嘅嘉年華會，連同市民等1051人，創咗「經絡拍打操世界紀錄」。佢之後仲同中學生一齊炮製甜品，過咗一個充實嘅周日。