匯豐添「彩獅」 歡迎不同性向

【明報專訊】小琴噚日行過匯豐總行，發現多咗一對彩色獅子（圖），最初真係嚇咗一跳，莫非全球最大嘅債主，也會有被淋油嘅一日？後來匯豐嘅朋友提醒，絕對唔係呢回事，原來係為咗表達對LGBT（不同性傾向及跨性別人士）嘅尊重。


今次匯豐聯同LGBT藝術家林煒燊合作，而設計獅子嘅靈感來自於代表LGBT的彩虹顏色。左面開口嘅叫史提芬，又名為「自豪之獅」，塗上條狀花紋，猶如披上代表LGBT的彩虹旗；右邊合埋口嘅叫施迪，繪上象徵團結嘅圓圈，所以又叫做「團結之獅」。呢對獅子會擺喺皇后大道中嗰邊，而非取代德輔道中嗰兩隻傳統石獅。


匯豐一向喺同志平權方面走得好前，去年更曾被反對同性戀的組織指摘，因為集團為員工嘅同性配偶，提供與異性婚姻同樣嘅福利。


匯豐一向係香港人嘅大僱主，相信今次亦可以起帶頭作用，宣揚平等觀念。


email: piano@mingpao.com

[小琴密語]