下月上任總幹事 民主黨蔡雨龍盼「黨校」加倍招生

【明報專訊】下月上任黨內總幹事嘅民主黨中常委蔡雨龍，噚日同傳媒茶敘大談工作大計，佢話上任後其中一個任務就係擴張「黨校」，希望吸納更多唔同行業嘅人加入，學民主理念同公共行政，黨校現時一年約招收20人，蔡雨龍話希望未來可以加倍，用民主黨嘅網絡幫黨培育人才，為日後選舉「養蟀」。


30歲嘅蔡雨龍喺內地出世，兩歲半來港，及後留學美國。立法會議員林卓廷曾經係民主黨總幹事，蔡雨龍未來會唔會行同一條路，走入議會呢？佢形容自己唔適合參加選舉，希望先做好總幹事工作，但補多句「never say never（永不說永不）」，無為自己閂閘。蔡雨龍由銀行高職轉做政黨總幹事，佢話總幹事薪酬同做銀行嘅底薪差唔多，但就無透露唔見咗幾多「bonus」。


民主黨近年被指吸引年輕支持者能力稍遜，對於黨嘅路線，曾經同一班年輕泛民簽署「香港前途決議文」嘅蔡雨龍，強調民主黨唔會放棄爭取年輕人支持，佢承認要大規模改變年輕人諗法係困難嘅，但希望透過由黨重量級人物主持嘅小型活動，「擸得幾多（支持者）得幾多」。


民主黨下月改選領導層，蔡雨龍無透露心水人選，但就話同已表態參選主席嘅胡志偉合作到。