有話說﹕真•零功課政策

【明報專訊】傳統以來，香港家長都希望子女放學後嘅時間過得「充實」啲，因此往往會要求老師畀一定嘅功課量，否則就係誤人子弟。不過，好多新一代嘅家長已經唔係咁諗，反而要求老師畀少啲功課，最好少到可以喺學校完成晒，學吳克儉局長話齋，「回家零功課」，製造多啲親子時間。


但好可惜，「回家零功課」往往係一廂情願嘅想法，Mama有時亦懷疑經常出埠外訪嘅吳局長，係咪錯將其他國家「回家零功課」嘅教育政策，混淆咗已經係香港實行？

最近，家住將軍澳嘅80後師奶仔Hilda，不堪喺區內津校讀小三嘅囡囡，每日放學單係做功課已經要花3小時，佢曾經向學校反映過但無改善，於是決定喺facebook組織「TKO 95 group」，自發喺西貢區（95校網）做「網上小學功課，默書，評考量調查」，希望收集到實質數據向各校施壓，要佢哋公開各年級家課政策，同時要求教育局為小學家課量設限。最重要，係畀該區準小學家長有得參考，唔好送仔女入虎口。單打獨鬥下嘅Hilda，最終收到來自26間小學家長、合共526份回應，發現有四分之一學生每日平均要用超過2小時先做得完功課，另超過半數學生每日平均要花90分鐘溫習。


另一個家長組織「香港革新教育家長同盟」，受到Hilda啟發，於是聯同TKO 95 group、青衣家長會，正發動全港網上調查，之前就率先公布咗青衣區小學生功課量及測考狀况。


Mama立即搵來位處青衣、有份「被調查」嘅郭怡雅神父紀念學校校長張作芳傾幾句。張校長話，家學生功課量係咪特別多，佢唔敢講；但就好記得自己讀小學上午校時，放學後食完午飯，大約兩點幾開始做功課，死趕爛趕一輪，就剛剛好趕及喺播《430穿梭機》之前完成晒，咁阿媽先畀佢睇電視，所以估計，當年小學都大約係要用2小時做功課。之不過，張校長好理解，因為家幾乎所有小學都行全日制，小朋友放學時間已經遲咗，返到屋企又要花2小時處理功課，仲要再搵時間溫習的話，的而且確會無晒親子時間。


作為校長，佢經常提醒老師，功課能減的話就盡量減，但功課始終有其作用，能鞏固所學，所以張校長唔贊成「零功課」；不過，校方就可以盡量幫家長、小朋友騰空番啲親子時間出嚟。


以佢哋學校為例，因為考慮到大多數家長都係雙職，仔女放學後靠工人姐姐或老人家照顧，佢哋未必識得教小朋友做功課。換來嘅結果，就係細路仔一味喺屋企睇電視，直至爸爸媽媽放工之後先開始「大作戰」，咁咪搞到大家都辛苦囉！所以，張校長專登安排一班缺乏支援嘅學生留校做功課，一直做到五點，而學習能力稍遜嘅學生，更加可以留到六點，確保小朋友踏出校門時，已經做完功課溫好書，返屋企就可以好好享受天倫之樂。