禮賓府開放日 黃傘女士被禁

【明報專訊】噚日係禮賓府開放日，雖然天氣凍凍哋，但天色放晴，唔少市民特登去參觀。過去兩年禮賓府都有「緊張場面」，今年門口嘅保安依然睇到實，黃傘仍然係禁忌。


女長毛成功帶「黑手」內進

禮賓府噚日朝早10點起開放，去嘅人唔算多，市民喺門口做簡單保安檢查就入得，但有個王女士頭戴「誅狼殺鷹」頭飾，帶同「三權合污 人權捱沽」紙牌，同埋一把黃色雨傘，開宗明義要示威，話對參觀「皇宮」無興趣，結果就直接被帶到去門口嘅示威區，無得入去。反而「女長毛」雷玉蓮成功入到，仲行到大堂頒授勳銜位置附近，拎出一隻「玻璃黑手」大叫「689下台」，先畀人帶離大堂，佢就喺大堂外面擊碎隻「黑手」。


下晝到場參觀嘅李女士就話，自己鍾情於有中西合璧建築風格嘅禮賓府，每年開放日都嚟，噚日就發現禮賓府原來種咗洋水仙，覺得好驚喜。Emily多口問李女士，如果特首梁振英（CY）之後唔連任，今次可能係佢任內最後一次開放禮賓府喎，李女士就話每屆特首都應該開放禮賓府畀市民，唔覺得今次開放日有咩象徵意義，「六合彩淨係唔中『5、6、8、9』有象徵意義得多啦！」講緊嘅係前日開彩六合彩嘅號碼組合1、2、3、4、7、10同33。


不過，CY噚日三度現身禮賓府同參觀者打招呼，都有唔少人同佢合照，仲有人話支持佢。