公共空間大獎票選 「油街」最正 屯門公園最惹嬲

【明報專訊】近年市民愈來愈重視公共空間，由非牟利機構「拓展公共空間」舉辦嘅第二屆「香港公共空間大獎」已經結束，今屆有近4000人投票，當中「最正公共空間」冠軍，就由位於北角、由康文署活化歷史建築作為公共藝術空間嘅「油街實現」奪得。


「油街實現」係二級歷史建築，前身係香港皇家遊艇會會所，主辦機構話，由於該處環境優美，加上活動多元化，被譽為「摩天高樓之中的一點綠洲」。至於亞軍就由觀塘海濱花園獲得，季軍則由有「香港天空之鏡」美譽、西環拍攝勝地嘅「西區公眾貨物裝卸區」獲得。


網民投訴大媽唱歌造成噪音

除咗最正公共空間之外，主辦機構同時設立「最令人『嬲嬲』公共空間」大獎，當中冠軍得主係屯門公園，仲要大幅「領先」其他「對手」。唔少網民話，屯門公園經常有好多「大媽」唱歌，造成嚴重噪音問題，同康文署投訴完都無用；仲有網民話公園內懷疑有人作違法交易，「遲早就變咗舊九龍城寨黄賭毒乜都有啦！」亞軍係灣仔利東街（俗稱喜帖街），網民就批評嗰度同灣仔區嘅歷史脫節，「廉價販賣集體回憶」。但主辦機構話，都有網民覺得利東街重建後「有外國feel」，反映到唔同市民對公共空間嘅偏好可以好唔同。