劉小麗又甩轆 搞錯議程問錯題

【明報專訊】立法會新丁議員劉小麗噚日喺立法會又「甩轆」，當政制事務委員會討論緊《本地報刊註冊條例》收費調整，中途入場嘅佢唔知係咪無聽其他議員問乜，發言時就提出選委會參選人被取消資格（DQ），要求在場官員解釋吓。隔籬位嘅毛孟靜不停提醒佢，話佢知下個議程先討論特首選舉安排，不過劉小麗堅持要問，令大家都無佢辦法。


委員會噚日兩項議程，都係由副政制及內地事務局長陳岳鵬負責解畫。早前試過投票時撳錯掣嘅劉小麗，可能見到陳岳鵬坐喺度，就以為可以問相關選舉嘅議程，發問時要求副局長解釋何謂「與業界連繫不足」、點解有參選人被DQ，在場議員同Emily都聽到一頭霧水。


其實毛孟靜已經提醒佢未進入相關議程，但劉小麗堅持話「佢入面有提到選委會，即係成個選舉，我都好想副局長喺度回答」。最後陳岳鵬話，相信劉小麗講緊嘅係下個議程內容，唔係關乎《本地報刊註冊條例》；劉小麗先好似如夢初醒，話「咁我留番下一次先問啦」。