浸大生明食蟲抗議飯堂續約

【明報專訊】浸大學生會編輯委員會噚日喺facebook發帖文，報道不滿校方通過宿舍飯堂「浸大食坊」嘅續約議案，指控飯堂嘅膳食供應商營運至今一直出現「蟲患」，話不時都有同學食食吓飯發現有昆蟲殘肢。為咗抗議今次續約決定，幹事會聽日（周三）下晝2時15分喺飯堂「食炸蟲」，仲話啲蟲係來自香港一間雲南菜館嘅菜式，要成70蚊一碟。


學生會內務副幹事長蔡嘉禧話，「浸大食坊」一直以來都有蟲患，曾經有同學向食環署投訴，搞到飯堂享有「蟲Can（Canteen）」嘅別號。佢話校方今次通過續約決定令佢哋好不滿，希望用食蟲抗議嘅手段，令同學同有關方面反思呢個決定，亦會向校方遞交公開信，提出撤回決定、公開決策等訴求。


浸大餐廳營辦商美心發言人回應話，非常重視食品品質同店舖衛生，亦有嚴謹工作守則同指引，而「浸大食坊」仲會每日做全店清潔、每月由專業清潔公司徹底清洗，話會積極同校方跟進事件。