當年分隔兩地9年 一年見7日 金婚「新人」再行禮

【明報專訊】無國界義工噚日為19對銀髮「新人」舉辦第13屆「跨世紀長者婚禮」，每對「新人」閒閒哋都結咗婚幾十年。大會安排咗電車，載住幾百年嘅愛情穿梭港島，義工又向途人大嗌「佢哋結婚喇」，場面熱鬧，幸福滿溢。


19對銀髮長者曬幸福

踏入50年金婚之年嘅林先生夫婦，林先生後生時到廣州工作識咗現在嘅另一半，一見鍾情，仲喺內地爆發文化大革命之年結婚。佢哋生咗4個仔女，一家六口喺廣州生活多年後，林先生為咗生計回流返香港搵食，自此夫妻分隔兩地9年。


當時，林先生只可以趁年尾嘅7日假期去廣州一家團聚，每次分離時，林太都帶住細路到火車站「淚別」丈夫，林先生話，家諗番太太追火車嘅情景都會「眼濕濕」。


直至1989年，林太同細女來港定居，一家六口喺2000年才真正團聚。但地域上嘅距離並冇磨滅雙方嘅感情，林太話佢哋從來冇出現感情裂痕，林先生仲好感激太太對家庭嘅付出