68年來最大 「超級月亮」生輝 賞月熱情比中秋

【明報專訊】今年除咗農曆八月十五，噚晚都有機會賞月，今次仲係「超級滿月」，月亮最接近地球嘅一刻係晚上7時21分，滿月為晚上9時52分。不過最重要係天公作美，噚晚天清氣朗，市民抬頭已可觀賞到又大又圓嘅月亮。


下次要等到2034年

噚晚嘅超級滿月係68年以來最大嘅，錯過咗呢個機會，就要等到18年後，即係2034年先至有機會再見到呢個睇上去較一般滿月大7%嘅月亮，所以噚晚唔少市民紛紛外出，大批人聚集喺尖東海旁賞月，唔講仲以為噚日先至係中秋節。攝影發燒友就各自發揮創意，到唔同地區取景，並將得意作品喺網上分享。


噚晚網上社交媒體幾乎被超級滿月洗版，背景來自世界各地，不過有月亮偏紅，原因係大氣折射嘅關係，月亮會變成暗紅色，又稱為「血月」，空氣中嘅污染物濃度愈高，月亮愈紅。