凌嘉勤卸任 李啟榮升任規劃署長

【明報專訊】近年政府積極喺新界發展新市鎮起屋，洪水橋、元朗南甚至近期最熱議嘅橫洲，好多地區都有大量規劃工作，當中規劃署長凌嘉勤（KK）近年應該好忙。不過，現年59歲嘅KK做埋呢個月之後就退休。政府噚日公布，KK將於11月22日開始退休前休假，而副規劃署長、55歲嘅李啟榮將會喺當日開始正式出任署長一職。


睇番公務員事務局嘅履歷，KK於1983年9月加入政府，最初任職助理城市規劃師，之後「扶搖直上」，2011年2月晉升為首席政府城市規劃師後，2012年12月起出任規劃署長，做咗署長近4年。公務員事務局長張雲正話，KK在任期間積極帶領規劃署喺增加土地供應同促進香港可持續發展上作出重要貢獻，並喺城規會擔當重要角色，祝願佢退休生活愉快。


Emily聽聞，KK除咗熟悉規劃工作外，原來都好熱中參與同觀賞舞台劇，相信佢退休後可以有更多時間參與喇！至於即將坐正嘅副署長李啟榮，就喺1985年加入政府任職助理城市規劃師，2013年晉升為首席政府城市規劃師。