下周一晚7時21分請望天 1948年來最大超級滿月

【明報專訊】下周一香港上空將會出現「超級滿月」（Super Moon），今次超級滿月係繼1948年以來最大，天文台仲話，下周一睇超級滿月嘅時間比較好，因為月亮最接近地球一刻係晚上7時21分，市民食完飯，抬頭就可以見到又大又圓嘅滿月；而當晚「滿月」時間就係晚上9時52分。


錯過今次要等18年

若錯過今次，就要到2034年11月26日先可以喺香港睇到超級滿月，當日月亮最接近地球嘅時間係早上約6時32分，仲要非常接近地平線，效果一定無今次咁好。上次1948年，月亮最接近地球嘅時候，喺香港就睇唔到。


咁今次滿月有幾超級？天文台計算比較1901年至2050年最大嘅100個超級滿月，得出頭10位，發現最接近地球嘅超級滿月依次為1912年、1930年、2034年、1948年，下周一嘅滿月排第5位。不過天文台高級科學主任莫慶炎話，單憑肉眼睇，每次超級滿月嘅大小分別不大，以下周一為例，視覺上滿月會較平日睇到嘅滿月大7%。