李慧琼郭榮鏗請食Lady M 長毛：怕畀主席DQ冇得食

【明報專訊】今屆立法會劍拔弩張，幾乎每次開會都有混亂，但今個禮拜情况稍為緩和，大會無流會，開到夜晚先休會，而噚日舉行嘅內務委員會，主席李慧琼（Starry）同副主席郭榮鏗（Dennis）更夾錢用4位數，買咗70件Lady M蛋糕喺會後請議員食，建制同主流泛民都有唔少人捧場，但Emily所見，其他非建制議員中似乎得社福界邵家臻有食。


Starry話，請食餅係想慰勞議員，希望佢哋食完之後，大家相處可以融洽啲，議會運作暢順啲，而Dennis就笑住話「大家少啲廢話，就多啲餅食」。大會主席梁君彥噚日都有捧場，佢臨走時撞到社民連梁國雄（長毛），長毛半開玩笑話驚主席「DQ（取消資格）我食餅」，形容大家都係「梁氏宗親會」，叫對方保住佢咁話。


譚文豪幫記者爭取

公民黨譚文豪食完餅後就為記者爭取福利，笑言Starry同Dennis「唔啱」，應該買埋記者嗰份。經民聯林健鋒就建議下次將西餅切細件上，以防有人掟餅。