WhatsApp游說成功 涂謹申立選獲梁錦松捐10萬

【明報專訊】立法會議員近日陸續申報選舉捐贈，Emily翻查議員個人利益登記冊，喺超區險勝嘅民主黨涂謹申，原來獲前財政司長梁錦松捐10萬元，雖然唔係小數目，但阿涂透露，其實只係靠WhatsApp信息就說服咗對方捐錢，相信對方覺得民主黨係可以做事嘅政黨而願意捐錢。


阿涂話，參選超區開支大，但黨對資深議員嘅資助較少，所以選舉時會尋求無條件捐款，佢喺WhatsApp將募捐信息發畀所有人，而阿松出席過民主黨周年晚宴，所以主動聯絡對方，阿松就答應捐錢。除咗阿松，阿涂亦獲得近70筆大大小小捐款，總數超過130萬元，其中黨捐咗67萬元，「蘭桂坊之父」盛智文亦捐咗2.5萬元。


民建聯超區奪兩席 用近千萬

同樣循超區當選嘅民建聯李慧琼同周浩鼎，分別獲民建聯一筆過捐528萬元同497萬元，兩個議席就用咗民建聯過千萬。「票王」民主黨鄺俊宇得到黨205萬元捐款，街工梁耀忠報稱無接受捐贈。


鄭經翰捐17萬助劉小麗

地區直選方面，新民黨葉劉淑儀獲同為行會成員嘅李國章捐2000元，收到捐贈共逾156萬元，而民主黨林卓廷都獲盛智文捐5萬元，總捐贈逾76萬元。獨立議員劉小麗獲得嘅捐贈中，包括名嘴鄭經翰捐嘅17萬元，劉小麗話係宣傳品同報章廣告贊助，唔係現金，又強調捐款冇政治或附帶條件。