新官想郁關二哥 下屬驚唔吉利 葵涌警署現真．關公災難

【明報專訊】警隊一向都有供奉關帝嘅習俗，Emily聽聞近日葵涌警署嘅關帝像被下「驅逐令」，事緣有新上任嘅主管唔信關公，諗住移走佢，途中就不慎跌咗把關刀，有好多同袍都覺得唔吉利，已越級向指揮官反映事件，名副其實係「關公災難」。


呢單災難噚日喺警隊WhatsApp群組瘋傳，因為警隊一向都有拜關公嘅習俗，但據悉葵涌警署嘅警區刑事偵緝總部近日有新主管上任，該主管話自己唔信關二哥，要求移走關公像，仲話唔移走就會掉爛佢。


結果喺無人理佢嘅情况下，個主管就自己拎走個關公像，放入茶水間，仲叫人快啲將神枱連關公像搬走，過程中仲整跌咗關公手中把關刀添。依家個關公像畀人放歪咗，好似面壁思過咁，而把關刀就咁放咗喺神枱。Emily問過警察公共關係科，至截稿前未獲回覆。
警長越級反映 要求重新作法
Emily聽聞有好多警隊同袍都覺得，咁樣移動關公像好唔吉利，據知有兩名警長已越級直接向指揮官反映事件，並獲指示要請番原本為關公上位嘅馬來西亞法師重新作法，但法師已經拒絕安排，依家仲搵緊高人幫手處理。