熊志添退休 「趁後生」做背包客

【明報專訊】已屆60歲嘅新界東聯網總監熊志添今日起正式卸任，展開退休休假，早前先去完新疆旅行，噚日同傳媒茶敘時就分享嚟緊嘅旅行大計。佢話今個月底會先去南極同南美洲，出年2月再戰冰島，幾乎去勻半個地球，熊醫生就話要「趁後生」去多啲地方喎。


先去南極南美 出年去冰島

講番今次南極同南美之旅，熊醫生話早於一年前已經開始計劃，除咗影企鵝之外，仲會去影南極嘅冰，呢個就好考技巧，要等到有光至影到靚相。至於有「天空之鏡」美譽嘅玻利維亞烏尤尼鹽湖都係佢目標之一，佢話拎行李箱唔太方便，所以打算到時做「背包客」自由行。


熊醫生話去到玻利維亞可能會途經森林，為預防黃熱病已做足準備去打針，初時負責打針嘅醫生話60歲以上人士接種黃熱病疫苗會增加併發症風險，但唔打針嘅話受感染後死亡率又高達四成，所以點都打咗先！

至於明年嘅冰島之旅就係一班舊同學聚會，醫管局聯網服務總監張偉麟都會同行，大家仲會去足一個月。熊醫生話，同接任者、原職醫管局策略發展總監嘅羅思偉交接好順利，自己出年會轉去中大公共衛生及基層醫療學院教書，除咗醫院行政，仲會研究拿手嘅太極與痛症，遲下再諗會否「補鐘」做番麻醉科醫生。