馬恩國閉關寫書

【明報專訊】唔知大家仲有無印象，民建聯大律師馬恩國做主席嘅「中澳法學交流基金會」今年5月訪京團，接連爆出大新聞，除咗「槍炮論」外，又被爆有團員「喜愛夜蒲」，連名譽顧問兼港區人大代表譚惠珠同高級顧問梁美芬都割席。事隔唔夠半年，馬恩國噚日同Emily透露好消息，話梁美芬噚日正式回歸。被問及會否邀請譚惠珠歸隊，佢就話「遲啲先」。


其實自訪京團醜聞後，馬恩國低調咗，原來佢最近潛心寫書，係有關Hong Kong Basic Law Principle and Controversy（基本法原則和爭議）。佢話已寫咗近11萬字，預計明年初可完稿。佢又披露，書中談及基本法爭議部分最精彩，會講吓自決係咪合法，以及國際法例中香港係咪屬中國一部分等。