CY自揭「換7」 「排隊應該的」

【明報專訊】特首梁振英（CY）日前被影到現身中環蘋果專門店（Apple Store），試用最新推出嘅iPhone 7，仲同職員有講有笑。CY嘅facebook噚日發文話屋企有人跌壞咗iPhone 6，所以當日落中環，順便去蘋果專門店買部iPhone 7喎。文中強調CY自己有排隊，話「當日顧客不少，人人都排隊，應該的」。


CY話，網上有幾張佢嘅照片，引起大家興趣，問佢係唔係「換7」。佢詳述當日買機程序，「是先在一樓落單，收到確認電郵後憑電郵到三樓取機」。


出席辯論賽 遇學生挑機

另外，CY噚日出席一個校際辯論賽，活動尾聲由台下學生向嘉賓提問，第一個發問嘅學生哥就挑戰CY，問CY如果一個特首需要喺民望低嘅情况下連任，會點樣提升民望呢？話音未落，現場已經一片掌聲，呢個學生再問CY喺立法會選舉，支持非建制嘅總票數比建制派高，「你如何檢視自己建立香港營嘅成效呢？」

CY保持笑容咁話團結香港好重要，政府面對唔同持份者，唔能夠同時滿足大家要求，而民調顯示市民最不滿自己同政府嘅，都係有關房屋問題。CY承認房屋問題積壓咗好耐，短期難以解決，所以自己會堅持做落去，迎難而上咁話。