梁美芬組立會建制律師團

【明報專訊】新一屆立法會中唔少議員都具法律背景，包括民建聯周浩鼎、張國鈞，獨立何君堯，工業界吳永嘉，新民黨容海恩，令建制擁有律師背景嘅議員大增至8人。難得大家有共同語言，身為較資深議員嘅經民聯梁美芬，就籌組建制派跨黨派嘅建制律師團。當中4人響應，噚日第一次碰頭，傾吓議事規則同未來方向，梁美芬就做咗佢哋嘅聯絡人。


暫5人參加 未搵容海恩謝偉俊

梁美芬同Emily講，計埋佢暫只有5個人參加，皆因暫未同容海恩詳談。至於剛剛升任建制派「班長」嘅廖長江貴人事忙，但佢就話明，若有大事商討，都會參加會議。咁言行出名飄忽嘅謝偉俊有無邀請？梁美芬就笑言，對方好獨立，所以仲未有時間聯絡到。


呢個建制派跨黨派合作平台，共同語言係法律，梁美芬更話願意同泛民有法律背景嘅議員溝通，仲話早已釋出善意，新一屆立法會司法及法律事務委員會，佢願意擔任首兩年主席，第3及第4年就由泛民出任。


回憶老師許崇德「追債」 一度落淚

梁美芬噚日亦舉行新書發布會，邀請咗唔少好友捧場，包括同門師兄弟之一嘅中聯辦法律部長王振民。


梁美芬席間更談及自己當年喺北京人民大學研究《基本法》，師從內地「四大護法」之一、已故嘅許崇德。談及許老時，佢一度感觸落淚。佢話答應過老師會寫一本中文版講基本法嘅書，老人家喺八十大壽時，更向佢追債。遺憾許老喺2014年3月去世，而佢家先完成呢本《香港基本法——從理論到實踐》，無法親手交功課。


梁又話，香港人同中國人性格含蓄，而愛國係高尚情操，應該勇敢啲表達，更當場講「我真係好愛自己國家」。