監警開會超時 張華峯問可否「剪布」

【明報專訊】監警會噚日召開同警察投訴課嘅聯合公開會議討論多個議題，委員黃碧雲表現踴躍，成個會因為咁超時1個鐘，令副主席張華峯忍唔住罕有發言問主席郭琳廣，監警會有無得「剪布」。


噚日會議有成七大議程，原定下午4點10分完會。其中問到全國人大委員長張德江訪港嘅保安安排時，黃碧雲多次要警方交代制訂本港恐襲風險嘅準則，嗰陣時會議已經超時約半個鐘，一批委員陸續發言覺得唔使即場傾呢樣嘢，呢個時候張華峯就出聲：「我諗我哋啲時間好緊迫好寶貴，主席，立法會就可以剪布，呢度如果有人拉布可唔可以剪布？」


郭琳廣聽完苦笑幾聲，張華峯就立即起身走人，黃碧雲當然好唔忿氣，話自己都係按法定職能問問題，「我懷疑有啲委員唔係好知自己職能係咩」。郭琳廣就回應話「我哋都唔想開到半夜三更」。