長毛買咖啡 店員紙杯畫心支持

【明報專訊】社民連立法會議員梁國雄（長毛）6月畀廉署告公職人員行為失當，單案噚日喺區域法院預審。長毛行入法庭之前，興高采烈拎住個咖啡杯畀Emily睇，原來朝早長毛去買咖啡嗰陣，女店員除咗寫上「長毛」嘅大名，仲喺杯上面畫心心同笑哈哈（圖）。


支持長毛嘅唔止呢個哄得長毛咁開心嘅女店員，噚日仲有20幾個支持者，晨早就嚟到法院聲援長毛，仲同佢一齊嗌口號：「欲加之罪，何患無辭。」單案件押後到11月25日再預審，長毛走嗰陣再次強調案件係政治檢控，成功連任立法會議員嘅長毛同大家講：「我唔會驚，多謝香港市民信任我。」