特首選舉在即 明報啟動追蹤民調

【明報專訊】距離2017年特首選舉不足半年，至今仍未有人正式表態參選，連特首梁振英（CY）亦未明言會否爭取連任。「跑馬仔」嘅呢股氣旋逐漸逼近，明報為了解民情如何看待呢場重要選舉，即將啟動一系列民調，以追蹤市民對可能未來特首嘅睇法。


定期發放 每次問千人

Emily了解所得，明報委託港大民意研究計劃嘅民調會定期發放，至明年3月特首選舉前夕為止，我哋每次會問成千人，因為呢個樣本規模嘅代表性會準啲，參考價值當然會高啲啦！雖然香港絕大部分市民都無得直接投票，但明報中人深信，民調結果或多或少會影響手執重要一票嘅人嘅決定。因此Emily呼籲大家，收到調查人員嘅電話時，請抽少少時間，畀啲心機答問題，因為你每一句意見都有影響力。


港大民研：梁振英評分回升

講開民調，港大民研噚日公布特首梁振英評分，佢嘅評分回升2.2分，升至38.7分水平，其最新支持率為22%，反對率65%，民望淨值為負43。特區政府方面，對比一個月前，民望亦有所上升，但變化不超過抽樣誤差，最新滿意率為25%，不滿率為47%，滿意率淨值為負22。呢項調查喺9月19至22日做嘅，訪問咗1012名巿民。