胡志偉﹕單車節賽道好爽

【明報專訊】單車節噚日舉行，鍾意踩車嘅民主黨議員胡志偉出戰50公里挑戰組，踏足「三橋三隧」路段。佢話自己5點半出發，約7點半已返到終點，按此計算，兩個鐘踩咗50公里，時速25公里都算成績唔錯。


志偉話今次賽道好爽，可以踩上大橋及入隧道，仲話作為車手，最過癮一段梗係尖山隧道路段，因為捱完一段上斜，然後衝下坡一段長命斜，速度感十足。大會禁止車手喺賽道上玩selfie，志偉話50公里組別大多數車手都比較專業，唔覺好多人自拍，大家都享受飈車樂趣。


佢話舉辦呢啲大型賽事可增加社會凝聚力，雖然要封路，但範圍可接受，叫政府應多啲支持辦呢類大型活動，而自己亦會繼續參加單車賽。主辦單位新地嘅執行董事郭基煇都有落場，用咗1小時19分完成50公里賽，至於同時有份參加嘅隊制計時賽則得到第5名，佢話滿意成績。