上市商會否認上京告御狀

【明報專訊】早前在上市監管架構諮詢，同證監會「撐到行」嘅上市公司商會，前幾日拉大隊到北京拜會人行、中證監、國資委、港澳辦等部委，正當大家都以為佢哋係就住上市諮詢嘅事，上京「告御狀」之際，點知噚日見傳媒嗰陣就嚟個反高潮，話冇呢回事喎！

商會主席梁伯韜（圖）噚日就同傳媒講，佢哋訪京，係就住點樣加強中港互聯互通、公司管治、人民幣國際化等等嘅宏觀議題，同內地溝通，但就冇同內地監管部門，具體咁傾過上市監管諮詢文件。佢仲話香港人有足夠嘅智慧去處理呢件事，唔需要內地嘅介入，而且諮詢文件嘅內容十分複雜，如果唔係非常熟悉香港市場，亦好難畀意見咁話喎！


雖然梁伯韜話冇同內地監管層「具體」咁傾過，但實際上傾到咩地步先叫「具體」呢，小琴真係唔知。


email: piano@mingpao.com

[小琴密語]