二少做立會主席？ 田北俊：搵我細佬嚟搞

【明報專訊】新一屆立法會下個月開鑼，第一件事係選出立法會主席，目前經民聯梁君彥仍然係主席熱門人選，但獨立嘅謝偉俊話會認真考慮參選，新民黨田北辰亦有意競逐。不過，田北辰哥哥、自由黨田北俊就表明唔支持細佬做主席喇。


笑言比吸煙更危害健康

行將離開議會嘅田北俊解釋，主席要承受好大壓力，又笑言做主席比吸煙更危害健康，咁手握4票嘅自由黨會唔會支持舊黨友田北辰先？田少就話：「我覺得佢身體要緊，梗係叫自由黨唔好支持佢，但我唔係議員，只可以畀意見。」


田北俊話，雖然細佬自覺同泛民關係和諧，但據佢觀察，泛民對田北辰並唔服氣，又話新民黨同其他建制派關係普通，細佬同主席葉劉淑儀經常各有說法，加上新民黨喺來屆議會只有3名議員，唔覺得其他建制派「有預埋佢哋嗰份」，故做主席只會泛民、建制兩面不討好。


至於其他主席可能人選，田北俊覺得「商界（第二）」廖長江、謝偉俊都能夠同泛民溝通，民建聯李慧琼就四平八穩，都係可考慮人選；但佢就話葉劉淑儀係「最佳主席人選」，因為佢係資深直選議員，又同各黨派關係良好，「但葉劉想做特首，唔想做主席，搵我細佬嚟搞」。