中秋送暖 陳葒校長明哥拍住上

【明報專訊】提供免費補習服務嘅陳葒校長、供應免費飯盒嘅「深水埗明哥」陳灼明，噚日走埋一齊，原來係馬會慈善及社區事務執行總監張亮「撮合」兩人，一齊喺中秋節前夕送暖，去到深水埗通州街天橋底，為有需要長者送上熱騰騰嘅飯盒同應節月餅。


馬會撮合 兩人分享公益經驗

馬會同呢兩個有心人其實有合作項目，邀請兩人出席今個月22至23日舉行嘅馬會「慈善共創 都市聚焦」國際慈善論壇，同100名與會者分享經驗。呢個論壇探討慈善工作喺社會問題上扮演嘅角色，設五大主題，包括創新及科技、青年發展與教育、人口老齡化及健康、公私合作模式、環境及可持續發展等。陳葒同明哥一直用自己嘅方法提供公益服務，相信有好多經驗值得借鏡。