解釋選舉論壇答非所問 容海恩﹕前輩教唔好直接答

【明報專訊】新民黨年輕大狀容海恩新當選立法會議員已成網民熱話，事關佢早前喺選舉論壇口才麻麻，選後接受傳媒訪問更連番引爆「炸彈」；佢噚日上商台節目，被主持人陳志雲追問，點睇黨主席葉劉淑儀於勝選當日被傳媒影到密會中聯辦一事，容海恩就話都覺得呢個行為令「大家會覺得奇怪」，但因為要尊重「保密協議」，所以都無追問，強調自己真係唔知情。


話葉太會中聯辦令人「覺得奇怪」

至於如果同一情况下接到邀請，佢會唔會去中聯辦？容海恩就話「睇吓要傾啲咩，又要睇邊個見，同埋都唔知咩事喎」，但補充「可能都避免入去喇，因為都唔知咩事」。聽到愛徒話自己奇怪，唔知身為師父嘅葉太會點諗呢？不過佢呢幾日同阿女飛咗去英國放鬆一下，應該唔會咁快有反應啩。


陳志雲繼續關注容海恩，質問佢自認最佳溝通員，卻經常答非所問，容海恩就話，第一因為緊張，第二驚講錯嘢，第三有好多「前輩」教導「你唔好直接答佢呀」。主持追問，「前輩」係咪包括葉太，容就醒目咗，只係話「好多人教」。