原周日赴英 周永康未收到簽證

【明報專訊】學聯前秘書長周永康（Alex，圖）將會去英國讀碩士，本來已經訂好機票星期日（18日）飛英國，準備出席下星期嘅迎新活動，但佢噚日同Emily講仲未收到簽證，有可能要延遲飛英國。


懷疑與「刑事案底」有關

Alex話上個月23號先去英國總領事館申請快證，正常嚟講一星期左右就會批，不過佢等到噚日都未收到，懷疑可能同自己早前被裁定參與非法集結罪成有關，「有個刑事案底」。佢話已經向領事館查詢，對方未有回覆。


有反佔中嘅網媒知道Alex未拎到簽證，就好似執到寶咁嘲笑，話「難道連英國老爹都唔想你入去」。已經習慣被左派批評、加上家學佛嘅Alex一笑置之，話呢啲講法係笑話一則。