4點鐘許sir帶實習記者遊警署

【明報專訊】佔領運動轉眼間過咗近兩年，市民當時幾乎日日喺電視見到主持警方記者會嘅「4點鐘許sir」許鎮德（右四），許sir轉去深水埗警區做指揮官後，都少咗現身公眾場合，但原來佢仲係好活躍㗎。


終於可送阿女英國開學

Emily噚日睇警察刊物《警聲》，就見到許sir於上個月帶咗班報館實習記者，參觀本身係二級歷史建築嘅深水埗警署，聽講仲有帶班實習記者去睇吓警察攞口供嘅錄影會面室、犯人倉，以及警察攞槍嘅流程及監管程序。


佔領期間，許sir因為要留港主持警察記者會、回應傳媒查詢等，唔能夠親自送阿女到英國讀大學，畀阿女同老婆詐型。Emily聽講許sir今年終於可以做到廿四孝老竇，送囡囡去英國開學喇。