城大研發人造樹葉 吸二氧化碳變燃料

【明報專訊】二氧化碳導致全球暖化，但原來都可以創造經濟效益，香港城市大學最近研發咗一款專吸二氧化碳嘅人造樹葉，透過化學作用可以轉化成燃料，仲可以改善溫室效應。

以光合作用做藍本

二氧化鈦人造樹葉係由城大能源及環境學院副教授張謂揚，聯同新西蘭坎特伯雷大學化學工程系高級講師葉賜健共同研發，主要係利用二氧化鈦光觸媒製造人造樹葉，精密咁複製樹葉嘅主要結構，以光合作用做藍本，利用陽光同水，轉化二氧化碳成有用嘅化學製品，例如甲酸、甲醇和甲烷等。

張謂揚話，舊年12月嘅聯合國巴黎氣候峰會已訂下目標，以工業革命之前為基準，全球平均溫度上升唔超過2℃，佢哋今次嘅人造樹葉亦可以減少二氧化碳排放。至於下一步研究，佢哋會嘗試將唔同嘅自製催化劑固定喺人造樹葉上，等樹葉選擇性將二氧化碳轉化成燃料同有價值嘅化學製品。

呢個團隊之前亦致力研究各種重要化學反應，如清潔氫燃料生產、生物質能源、分解飲用水中嘅致癌化合物，仲有處理環境污染等。