科技園新CEO﹕喺香港搞科研似唐吉訶德

【明報專訊】今年2月1日先至加盟科技園出任首席企業發展總裁嘅黃克強（Albert），8月1起更上一層樓，由前行政總裁馬錦星手中接棒，成為科技園嘅新CEO。Albert上咗任個幾月，上周搞咗個茶敘，向傳媒講佢嘅大計，尾聲時，陪同佢出席活動嘅公關主動爆料，話Albert係長跑好手，將話題轉到佢個人身上。


短跑好手 近年愛長跑

Albert話佢熱愛運動，讀港大嘅時代係100米同200米紀錄保持者，當年佢嘅100米紀錄係11.5秒，佢話唔算快，後來Emily上網Google下，發現男子田徑100米嘅香港紀錄係10.28秒。Albert又係大學足球隊，係英超曼聯擁躉，但近年佢喜愛咗長跑呢項「枯燥」運動，連佢自己都話好悶，但跑跑吓全馬都難唔到佢，除咗渣馬，仲去外國參加馬拉松。


Albert又分享自己讀中學嘅時期愛上小說《唐吉訶德》，話好欣賞故事主人翁堅持自己嘅想法，咁Emily就問佢，喺香港搞科研係咪有啲似唐吉訶德？佢好爽快回答﹕係有少少似㗎。