范太談選舉威嚇 質疑永勤讚凱廸

【明報專訊】選舉前後，接連有候選人話受到威脅，包括同出選新西嘅自由黨周永勤同當選「票王」朱凱廸，搞到人心惶惶。不過對於兩個人遭遇，政界反應就唔太一樣。


被問到周永勤棄選會唔會令人擔心「一國兩制」受損，全國人大常委范徐麗泰噚日話，對周永勤一切說法存疑，無打算要求人大跟進。


范太話周永勤聲稱恐嚇佢嘅人「高級過中聯辦」，質疑中聯辦已經係部級，「要更高級，職級至少要國務委員或者政協副主席以上」，難以想像、難以理解。佢又話，「無勝算，根本無乜人會同你講嘢」。


不過范太轉個頭就讚朱凱廸報警同埋搵警方保護，做咗「應該做嘅事」，「唔報警齋講無意思」。范太強調香港係法治之區，政府必須保障朱凱廸人身安全，查清事件，希望將威脅朱凱廸嘅人繩之於法。