中秋逢「半影月食」 20年難見

【明報專訊】下個禮拜四（15日）係中秋佳節，天文台提提大家話，今年嘅中秋滿月將會喺下個禮拜六（17日）先會出現，滿月期間仲有出現中秋「半影月食」。半影月食喺凌晨12點53分開始，過程超過4小時，有興趣賞中秋滿月嘅市民相信就要捱吓夜，因為滿月會喺凌晨3點05分先出現。


半影月食其實係月亮進入地球嘅半影，而唔進入本影，令月光略為轉暗，唔係好似月全食咁，成個月亮消失咗。天文台話，今次中秋滿月月食係20年難得一見，對上一次香港可以睇到嘅中秋滿月月食，已經係1997年9月17日嘅月全食。如果今次睇唔到，就要等26年，下一次中秋滿月月食會喺2042年9月29日再出現。


如果唔想凌晨追月，天文台話中秋節前後嘅晚上，只要天氣許可，都可以睇到皎潔明月。


詳細嘅賞月資訊同最新嘅天氣狀况，天文台話可以去天文台嘅天文觀測天氣資訊網，方便迎月、賞月同追月嘅市民！