被稱「西環契女」 容海恩又申冤 葉劉安撫：我都畀人叫掃把頭

【明報專訊】新當選立法會議員、新民黨容海恩（Eunice）最近有個花名家喻戶曉，就係「新西環契女」。佢噚日喺茶敘再申冤，話中聯辦無幫佢手配票，「有咗就唔會咁少票啦」。旁邊佢嘅師傅葉劉淑儀明顯就睇得開啲，幫口話「我都畀人叫掃把頭啦，叫吓無所謂」。葉太話，呢個只係過程，最緊要係問心無愧。


容稱未獲配票 「有就唔會咁少」

不過葉太被問到點睇Eunice之前喺選舉論壇嘅表現，一直有幫手補堂嘅葉太都話，辯論技巧的確令人失望，顯得手足無措，「可能雞精食得太多」。不過葉太就話，自己當年第一次喺立法會發言一樣咁騰雞，相信假以時日Eunice一定會上手。


葉劉對容辯論表現失望

論壇發言唔及人哋，咁入議會之後會唔會質詢政府高官欠火力？Eunice就話，質詢政府最緊要係講話有理據。佢又話，呢段時間會搵葉太請教，之後就打算加入司法、環保同房屋事務等委員會。


自由黨失去咗新東議席，Eunice日前接受《明報》專訪時就話自由黨欠缺地區樁腳，單靠田北俊魅力力度不夠，結果自由黨主席鍾國斌噚日喺港台節目上反駁。鍾國斌認為自由黨雖然無地區樁腳，但唔代表佢哋無做地區服務。鍾又話Eunice喺選舉論壇嘅表現唔好，「唔覺得佢中到咩議題……好多時都話返去研究」，但鍾仍期望同Eunice合作，因自由黨想做「和事老」角色喎。