哈囉喂「兒童止步」景點吸客

【明報專訊】海洋公園一年一度嘅「哈囉喂」將會喺下月2日開始，今年入場除咗可以做捉鬼敢死隊，仲可以見到台灣藝人唐禹哲化身3D投射影像嘅殭屍。海洋公園搞咁多鬼怪，無非想吸客。園方話，舊年「哈囉喂」約有100萬人入場，估計今年會多5%至10%。


今年「哈囉喂」有8個「猛鬼景點」，最驚嚇嘅係「16禁」，裏面有血淋淋嘅恐怖場面、人體實驗品，需要16歲或以上、接受到極度驚嚇嘅人先玩得。另一個猛鬼景點會以1980年代電影《捉鬼敢死隊》做主題，到時會有鬧鬼大宅、凶靈地下鐵等多個經典場景。如果擔心太驚嚇，可以去旁邊嘅「捉鬼敢死隊學堂」，用雷射槍射擊鬼怪等。


若想睇下明星，就可以去「心慌血色吧」，台灣藝人唐禹哲會化身殭屍王，用3D投射影象方式現身，同入場客一齊開瘋狂迷幻派對。