工聯會鄧家彪郭偉強「揸兜」求票

【明報專訊】立法會選舉噚日決戰日，各區候選人都盡地一鋪，其中工聯會新界東候選人鄧家彪同港島區郭偉強，更出動法寶「乞票兜」，為選票扭盡六壬。


一直被傳會遭建制派棄保嘅鄧家彪，噚日喺沙田乙明邨拉票時，高呼選情告急，慨嘆「要攞住個兜嚟乞票」。佢話現時立法會「隨時失去打工仔女席位」，期望工聯會支持者，尤其係上屆投票畀該會議員陳婉嫻嘅街坊，支持佢哋。


而下午時分，郭偉強都要出動工聯會榮譽會長鄭耀棠陪同「揸兜」幫手拉票，期望力爭港島最後一席。


佢大呻，近日受到港獨派同拉布派狙擊抹黑，有人更喺佢宣傳品上貼「夠票」貼紙，對自己選情有好大影響。