Deanie姐撐羅冠聰 清唱《撐起雨傘》

【明報專訊】呢屆立法會選舉，唔少選情告急嘅候選人噚日都各出其謀拉票，有候選人就搵到明星拉票；好似參選新界東嘅民建聯陳克勤搵咗藝人陳小春拍片助選，而香港眾志主席羅冠聰就搵到明星葉德嫻（Deanie姐）助陣。


幫羅冠聰拉票嘅Deanie姐喺片段中展示歌喉，清唱《撐起雨傘》，話香港需要年輕人晉身立法會，「我哋要還番個未來畀佢」，而佢就相信羅冠聰，呼籲市民投票支持，仲親自到杏花邨街站幫羅冠聰拉票。


陳小春拍片幫陳克勤助選

至於陳克勤，噚日形容自己選情「十萬火急」，希望支持者集中票源，並邀請陳小春拍片助選。陳小春喺片段中拎住陳克勤嘅卡通紙板公仔，呼籲市民盡早投票。早前陳小春亦都有幫參選新界西嘅律師會前會長何君堯拍片助選。