見總商會選民 林健鋒答問被指似拉布

【明報專訊】近日唔同傳媒都就不同界別辦選舉論壇，喺有競爭嘅選舉上，唯獨商界（第一）呢個界別未有搞，總商會為兩名候選人舉行閉門座談會，上星期自由黨陳浩濂出席後，噚日就到現任議員、經民聯林健鋒出席。


與會者透露，個半鐘入面林健鋒回應咗約10條問題，較陳浩濂嘅約20條少一半，林健鋒介紹政綱時亦特別解釋，佢好尊重對手，但擔心辯論會有惡意攻擊甚至敵對，影響商會和諧，所以覺得不應同場辯論。


據了解，林健鋒會上面對尖銳質詢，有會員質疑佢點解當日無就審議樓市雙辣招投票，林回應話自己唔支持，所以唔投票，有會員對呢個答案感失望，質疑點解林健鋒支持政改方案但又唔投票呢？林健鋒政綱提及支持低稅營商環境，有與會者問及，如果政府提出增加利得稅，咁林會點投票？佢話屆時要徵詢商會意見。有與會者形容，林健鋒答每條問題都好似「拉布」咁答成10分鐘，回答時又不時睇貓紙，所以唔算太多人可提問。


不過，據講有出席者問咗條尖銳問題後，林健鋒認出原來對方係陳浩濂嘅選舉經理，林健鋒同人講，知道對方同自由黨新增咗好多公司做新選民，多謝佢哋咁努力動員貢獻商會會費咁話。