內地健兒訪港 義工默默付出

【明報專訊】里約奧運會內地奧運精英代表團噚日結束訪港行程，佢哋今次行程總算順利，而星光背後其實有一批義工默默工作，喺運動員入住嘅酒店及各個場地幫手，部分人仲做埋運動員嘅助理，長時間貼身陪住運動員出入。


民政事務局政治助理徐英偉就話，運動員同班義工雖然只係相處咗幾日，但都建立咗情誼，好似噚日女排球員臨別時，就同義工擁抱道別，依依不捨。


徐英偉話呢批志願者協會嘅朋友，係活動嘅幕後功臣，讚佢哋係非常專業嘅志願者，當中有人曾經喺2008年上過北京奧運會做義工，佢哋喺今次有唔同崗位，有啲人喺酒店打點各項雜務，有啲喺場館幫手，有人負責做攝影師幫運動員影沙龍相。