行夜山遇紅雨被困 陳健民迷失一宵

【明報專訊】佔中發起人、中大社會學系副教授陳健民（KM）之前同朋友組成「民主毅行隊」，經常一齊行山鍛煉，最近因為天氣太熱，就轉為行夜山。點知噚日凌晨紅雨、山洪阻路，行山隊喺麥理浩徑被洪水困阻成晚，險象環生。好彩成隊人最終安全脫險。


KM喺facebook同大家報平安時話，本來打算由北潭坳行去馬鞍山，起步時西貢夜涼如水，點知去到雞公山之際暴雨忽至。8個行山隊成員被洪水圍困，仲有隊員濕身發抖，溪澗更變成激流。為安全計大家只好行回頭路，但山雨路滑，隊員都跌得一身泥濘、皮開肉綻。


KM話迷失咗整晚，終於等到黎明見得番啲山路，大家亦脫險。唔少人都為KM嘅經歷揑一把汗，但KM話事先有睇天氣報告，起步時西貢天色都好好。香港經常天有不測風雲，Emily提醒大家行山前一定要留意天氣呀。