會計界陳弘毅聲演動畫拉票

【明報專訊】今屆立法會選舉唔少候選人都用網絡攻勢及拍短片宣傳，包括功能界別候選人，出選會計界嘅陳弘毅就無現真身，但用聲音演繹，用動畫叫人投票支持佢。動畫以開車做故事背景，陳唔點名咁批評對手梁繼昌，形容對手過去4年好似開住架車兜嚟兜去「原地踏步」、浪費時間，因為對手「正職係律師，兼職係做司機」喎。陳弘毅就形容自己係電單車手，並且係專業會計師，會幫會計界搵到商機，搭佢車無錯。


具法律及會計資歷嘅梁繼昌就打認真牌，連日喺facebook公布不同範疇嘅政綱，唔止講會計界搵食問題，好似噚日就介紹房屋政綱，建議設立三級制公營及公私合營房屋策略：「公屋」、「居屋」、「夾心階層住屋計劃」，話應令社會各階層受惠，同時達至讓公屋住戶向上流動嘅長遠目標。