財爺借奧運追星反港獨

【明報專訊】里約奧運會內地奧運精英代表團來港掀起追星熱，財政司長曾俊華噚日借題發揮，以體育扣連民族團結，申明愛國情懷，話相信每個香港人同佢一樣，喺享受比賽嘅過程中能夠深刻體會到團結嘅可貴，毋須多餘嘅辯論，都能夠喺團結和分裂之間做出非常容易嘅抉擇，「所謂的港獨主張必然不可能會有市場」。


財爺話，運動除咗強身健體，亦包括品德培養。佢話喺奧運會呢個舞台，發揮咗推廣國族團結、種族平等、友愛、和平等更高價值嘅作用。佢話自己後生時參加過唔少劍擊比賽，當教練後亦會每年帶隊參賽，話比賽唔止追求獎項，仲有不斷挑戰自己、超越自我。


財爺又話，比賽過程所得到同所展現嘅往往比獎項更具意義，例如今屆奧運，大家會記得林丹同李宗偉賽後互換波衫擁抱、李慧詩同對手美雅絲喺單車場館攜手繞圈呢啲動人場面。