「捉鬼聯盟」狙擊 林卓廷單獨應戰 支持率偏低 陳志全否認棄選

【明報專訊】做過廉署調查主任、今年出戰新界東直選嘅民主黨總幹事林卓廷，早前向外披露廉署內部消息。不過，由「保衛香港運動」發起人傅振中同民建聯前區議員陳雲生牽頭嘅「全城捉鬼大聯盟」，噚日就去民主黨太子總部所在大廈外示威，批評林卓廷「廉署機密隨口講、出賣私隱為選票」，話要阿廷交代消息來源。


林卓廷就無有怕，單人匹馬到場應戰，即被40幾個示威者包圍，雙方擾攘十幾分鐘理論後，阿廷返番總部。佢話廉署舊同僚係見到廉署內部有大問題，先搵自己代為發聲，自己披露廉署嘅「種種不合理」，廉署從未否認，又形容話佢爆料博選票嘅說法「荒謬」，因為自己披露嘅資料全部關乎公眾利益。


阿廷噚日仲畀新東對手舉報。獨立候選人方國珊去咗廉署，指阿廷炒作2011年嘅報章報道，話方國珊當時得到新界社團聯會支持參選，仲得到中聯辦協助云云。方國珊強調，自己2010年退出自由黨後，就無接觸新界社團聯會，「遑論得到中聯辦支持」，批評阿廷抹黑，決定舉報。


另外，喺港大滾動民調支持率偏低嘅人民力量陳志全（慢必），噚晚同喺民調一直領放嘅公民黨楊岳橋，一齊喺facebook直播講選情，唔通楊岳橋都想呼籲支持者幫吓慢必？慢必前晚喺另一場直播否認自己棄選或「hea選」，話無論民調高低都唔會放棄。其間慢必雙眼泛紅，形容自己喺立法會大會同財會「盡心盡力」，話如果拉布路線失敗，其他民主派就未必會走到咁前。佢又批評造謠者「係咪想我死」，若造謠者係民主派，自己會更加失望。