電視台突擊測試 游蕙禎要人提水

【明報專訊】今年九龍西直選有唔少花生食，其中青年新政游蕙禎不時成為話題人物。有線新聞有個叫《和你SaySay》嘅選舉特輯，走勻各區突擊測試立法會候選人對不同議題嘅認識。噚日就播出部分九龍西候選人對「如果你可以改一條議事規則」嘅意見。點知游蕙禎要人「悄悄地」提水先識答，成個過程被電視台播埋出街。


個突擊測試搵咗關新偉、蔣麗芸、黃毓民同游蕙禎答上述問題。游蕙禎話要諗一諗，之後鏡頭就影到一個男子「悄悄地」同佢講咗一陣，之後游蕙禎就喺鏡頭前答問題。游蕙禎係唯一被影到要提水嘅候選人，有網民認為剪接偏頗，不過大部分網友都認為佢要再溫書，因為真係太唔熟書喇。


選舉在即，各候選人都加緊宣傳，不過，喺九龍西參選嘅民建聯蔣麗芸就「唔見咗」……張海報。Ann姐喺facebook貼咗張相出嚟，呼籲市民幫手搵海報。Ann姐話義工幫佢喺大角嘴街市貼嘅海報瞬間已經睇唔到，睇真啲，原來狄志遠嘅海報貼咗喺Ann姐張海報上面，難怪「唔見咗」Ann姐。


九龍西其他候選人包括﹕吳文遠、何志光、毛孟靜、梁美芬、譚國僑、朱韶洪、黃碧雲、林依麗、劉小麗、李泳漢。