有話說﹕玩具的魔力

【明報專訊】最近去朋友屋企坐，佢得一粒女，但就全屋放滿玩具，當中固然不乏女生至愛嘅煮飯仔、皇冠首飾、BB公仔啦，但就連兩三呎高嘅吹氣不倒翁，以及士兵、手槍、手銬、恐龍呢類咁男性化嘅玩具都有。Mama覺得好奇怪，於是忍唔住取笑朋友，問佢係咪恨仔恨到發燒，又或者打算追個仔，所以買定咁多男仔玩具呢？


Mama未講完，已經被朋友窒住，佢話﹕「玩具係中性嘅，根本無性別之分！」而且，每類玩具都有其獨特性，有啲係用嚟啟發創意，有啲就用嚟做角色扮演，而有啲就係畀小朋友宣泄情緒。所以「識玩」嘅家長，屋企嘅玩具箱，都應該有各類型嘅玩具，畀仔女按心情去選擇。


講真，Mama從來無想過，一件玩具原來可以咁有深度，朋友笑笑口話，其實佢之前都係同Mama一樣咁「膚淺」，多得阿女半年前，接受咗十幾次「遊戲治療」，佢先發現，原來遊戲、玩具有咁大魔力。


之後，朋友就一輪嘴，分享咗好多阿女之前點樣成日驚驚青青，乜都喊餐飽，但自從做咗「遊戲治療」之後，情况就明顯好咗好多嘅故事。Mama聽完，都覺得「遊戲治療」好掂，但就唔明白箇中道理，點解治療師陪小朋友玩吓啫，就可以改善佢哋嘅問題？咁如果爸媽抽多啲時間，投入啲陪仔女玩，又做唔做到呢個效果呢？


透過遊戲表達情感

註冊遊戲治療師督導郭燕玲（Bonita）解釋，「遊戲治療」之所以能夠喺小朋友身上發揮咁大作用，係因為遊戲本身就係小朋友主要嘅表達工具，就算小朋友唔識得點講，但只要有得玩，佢哋嘅情感就會透過遊戲表達出嚟。因此，一個受過專業訓練嘅治療師，應該可以好敏銳咁察覺到小朋友點樣玩玩具、揀乜嘢玩具玩，藉住玩具跟小朋友溝通，從而進行輔導工作。


咁父母親自上陣「陪玩」，又有冇幫助呢？Bonita話，一來家長唔係遊戲治療師，二來家長未必睇到問題嘅核心，即使睇到，但亦無能力去改變，因此，佢認為，最好都係借助外間力量介入。遊戲治療師嘅角色，就係做小朋友與父母之間嘅溝通橋樑，細路仔可經由治療師嘅觀察、引導，代佢哋將內心感受告訴父母，之後再作疏解、調適，平復佢哋嘅情緒。但Bonita強調，「遊戲治療」成功與否，都取決於治療師嘅經驗、家長願唔願意配合，以及小朋友有無智力或其他特殊問題。