CY：扶貧安老做出成績

【明報專訊】唔少政黨批評政府唔肯推動全民退休保障係唔顧長者生活，亦唔肯定勞工階層嘅貢獻；不過特首梁振英（CY）就唔係咁睇，佢噚日喺網誌度話，呢屆政府喺扶貧安老助弱嘅工作做出一啲成績。


指失業綜援個案多年新低

CY話，呢屆政府重設扶貧委員會，首次設立貧窮線，前年提出「低收入在職家庭津貼」，計劃接受申請3個月，已批出逾1.5億元津貼，惠及1.2萬個家庭，涉及人數近5萬，當中2.3萬人係小朋友。佢又話過去4年，政府用喺社會福利上嘅開支已經增加55%。而上個月因失業而申領綜援嘅個案，亦跌至1997年以來新低；因低收入而申領綜援嘅個案亦跌至1998年以來新低。


勞工及福利局長張建宗噚日出席活動後話，「低收入在職家庭津貼」初步反應可理解，當初統計處數據推算有20萬家庭合資格申請，但數據未有提供資產分佈等資料，令推算或有偏差，佢話未來會加強宣傳計劃，鼓勵有需要家庭申請，明年中又會檢討計劃。