指影射 港鐵拒刊方國珊廣告

【明報專訊】唔少立法會候選人都有喺公共交通工具賣廣告，希望接觸更多選民，不過就唔係所有廣告，機構都會落。好似喺新界東參選嘅獨立方國珊，原本打算喺港鐵大圍站大堂宣傳，但就被港鐵回覆話廣告有「影射成分」而拒絕刊登。


方國珊其實已向港鐵畀埋錢，租用大圍站轉乘馬鐵嘅方向一個廣告燈箱，但港鐵早前口頭回覆方國珊，以廣告含有「影射成分」為由拒絕刊登，方國珊話港鐵答唔到廣告內容究竟違反乜嘢守則，以及影射嘅係咩人。佢話港鐵作為一個開放嘅廣告平台，理應保持政治中立，歡迎所有有興趣客戶落廣告，唔應該自我政治審查。


睇番個廣告，方國珊形容自己係「真．工商管理學士」，左上角有個藍色「D」字，又寫有「請不要大話吹水」。究竟係咪影射其他候選人？咩嘢叫真學位？就由新東選民自行判斷喇。


新界東其他候選名單包括林卓廷、廖添誠、陳云根、梁國雄、張超雄、楊岳橋、麥嘉晋、鄭家富、葛珮帆、侯志強、李梓敬、鄧家彪、范國威、陳玉娥、黃琛喻、李偲嫣、陳志全、梁頌恆、梁金成、容海恩、陳克勤。