閱讀習慣調查 近半人得閒寧玩面書WhatsApp

【明報專訊】facebook呢本「大面書」出世後，大家都想知道對實體書有咩影響，噚日教協同香港流行圖書出版協會就發表「香港人閱讀習慣」報告。兩個協會上個月喺網上同街頭以問卷訪問583個市民，近半人話得閒時花最多時間玩facebook 、Instagram同WhatsApp，揀睇書嘅得7%。


調查機構仲話，七成受訪者每日只會花1個鐘或以下睇實體書。正當Emily擔心實體書嘅未來之際，調查機構又叫大家唔使絕望，因為有逾六成受訪者話，就算網上資訊多，實體書始終都喺內容上取勝，深入又準確，不能被取代。


雖然唔少人仲撐實體書，但有份發布結果嘅「香港金閱獎」秘書處執行長潘麗瓊就話作者、出版社同書店係時候轉型，例如同讀者多啲互動，好似可以叫網民一齊諗書名同設計，吸引網民落番書店買本書仔睇吓。


第三屆香港金閱獎亦開始網上投票，市民可以上香港金閱獎網站，揀選心水嘅最佳政經社會、醫療健康同文史哲書等等，其中入選「最佳政經社會」書獎嘅藝人喬寶寶拉票就話，唔好睇佢係南亞仔，佢清楚香港、愛香港，十足十「香港製造」 ！爭同一個獎嘅入圍書仲有曾鈺成、陶傑等嘅作品（圖）。最後結果由投票及大會評審委員會各佔嘅比重選出。投票日期至9月18日，結果於10月6日公布。